ღვინის მწარმოებლები (2024)

ანალიზში წარმოდგენილია როგორც ათწლეულების გამოცდილებისა და ყველაზე მდგრადი ფინანსური პროფილის მქონე „მარანი“, ისე 2019 წელს დაფუძნებული „რთველისი“, რომელმაც მოკლე დროში ₾23 მილიონიან შემოსავალს მიაღწია. ანალიზი ასევე მოიცავს კარგად ნაცნობ ბრენდებს: ₾50 მილიონზე მეტი შემოსავლის მქონე „ბადაგონს“, რომლის Net Debt/EBITDA 7.7x-ს აღწევს; ₾32-მილიონიან „თელიანი ველს“, რომლის სესხები აქტივების 72%-ია და რომელმაც 2024 წელი საოპერაციო ზარალით დაასრულა; ადგილობრივ ბაზარზე ყველაზე ძლიერი პოზიციისა და ყველაზე მაღალი სარეკლამო დანახარჯების მქონე „თბილღვინოს“; შვიდეულში ყველაზე მაღალი მარჟისა და კაპიტალის უკუგების მქონე „მილდიანს“; და საერთაშორისო ჯგუფის წევრ GWS-ს, რომელიც ვალს მშობელი კომპანიის კაპიტალის შენატანებით ამცირებს.

შვიდეულის ჯამურმა შემოსავალმა 2024 წელს ₾227 მილიონი შეადგინა, თითქმის იმდენივე, რამდენიც წინა წელს. ოთხ კომპანიას შემოსავალი შეუმცირდა, ხოლო „რთველისის“, „მილდიანისა“ და „თბილღვინოს“ ზრდა 10%-43%-ის ფარგლებში იყო. შესაბამისად, შვიდეულის საერთო მასშტაბი მნიშვნელოვნად არ შეცვლილა, თუმცა შემოსავლები კომპანიებს შორის საგრძნობლად გადანაწილდა.

შვიდეულის საშუალო შეწონილი EBITDA მარჟა 14.5% იყო. ზარალიანი „თელიანი ველის“ გამოკლებით, იგივე მაჩვენებელი 17.9%-მდე იზრდება, რაც საკმაოდ ჯანსაღი მაჩვენებელია როგორც ადგილობრივი, ისე საერთაშორისო ღვინის მწარმოებლებისთვის.

ჯანსაღი EBITDA მარჟების მიუხედავად, კომპანიების უმეტესობა საკმარის თავისუფალ ფულად ნაკადს (FCFF) ვერ ქმნის, მფლობელებზე განაწილებას კი მაინც აგრძელებს. 2022-2024 წლებში „ბადაგონმა“, „თბილღვინომ“, „მარანმა“ და „მილდიანმა“ მფლობელებზე ჯამურად ₾45.6 მილიონი გაანაწილეს. ამ ოთხეულიდან განაწილება საკუთარი თავისუფალი ფულადი ნაკადით მხოლოდ „მარანმა“ დაფარა. დანარჩენებმა ის ახალი სესხებით, დაგროვილი ფულადი მარაგითა და/ან აქტივების გაყიდვით დააფინანსეს. GWS-სა და „თელიანი ველს“ პირიქით — მფლობელებისგან ფინანსური დახმარება დასჭირდათ.

2024 წლის ბოლოს შვიდეულის სესხების თითქმის 80% „ბადაგონზე“, „თელიანი ველსა“ და „თბილღვინოზე“ მოდიოდა. სამივემ სასესხო კოვენანტები დაარღვია. დარღვევა ჰქონდა GWS-საც. ეს კი ზრდის კრედიტორებზე დამოკიდებულებასა და რეფინანსირების რისკს.

აქ განხილული კომპანიების გარდა, სხვა ღვინის მწარმოებლების დეტალური ფინანსური მონაცემები ხელმისაწვდომია finSPOT-ის პლატფორმაზე: https://finspot.ge/sectors/wineries

2024 წელს შემოსავლის ყველაზე მკვეთრი ვარდნა „ბადაგონს“ ჰქონდა: -21%. კომპანიის გაყიდვების უმეტესობა უცხოეთში ხორციელდება, ექსპორტის ძირითადი ბაზარი კი რუსეთია. შემოსავლები შემცირდა „მარანის“ (-7%), „თელიანი ველის“ (-6%) და GWS-ის (-2%) შემთხვევაშიც. ამ სამი კომპანიის 2024 წლის ბრუნვა 2021 წლის მაჩვენებელს 15%-24%-ით ჩამოუვარდება.

მეორე მხრივ, 2024 წელს შემოსავალი მკვეთრად გაეზარდათ „რთველისს“ (+43%) და „მილდიანს“ (+37%). ზრდა განსაკუთრებით თვალსაჩინოა 2021 წელთან შედარებით, როდესაც „რთველისის“ შემოსავალი მხოლოდ ₾4.6 მილიონი, „მილდიანის“ კი ₾15.5 მილიონი იყო. „მილდიანის“ 2024 წლის ზრდა მთლიანად ექსპორტზე მოდის: საექსპორტო გაყიდვები 49%-ით გაიზარდა, ადგილობრივი კი მხოლოდ 4%-ით.

„თბილღვინომაც“ ორციფრიანი წლიური ზრდა აჩვენა (+10%), თუმცა მისი ₾39.1-მილიონიანი შემოსავალი 2021 წლის ₾45.8-მილიონიან მაჩვენებელთან შედარებით კვლავ 15%-ით დაბალია.

ექსპორტი კომპანიების უმეტესობისთვის შემოსავლის მთავარი წყაროა, თუმცა გეოგრაფიულ ჩაშლას ანგარიშგებები არათანაბრად იძლევა. „თბილღვინოს“ საქართველოში გაყიდვებმა 2024 წელს ₾17.4 მილიონი (შემოსავლის 45%), ექსპორტმა კი ₾21.7 მილიონი შეადგინა. „მილდიანის“ შემოსავლის 84% (₾23.6 მილიონი) ექსპორტია, ადგილობრივი გაყიდვები კი ₾4.5 მილიონია. „თელიანი ველი“ მხოლოდ დსთ-ის ქვეყნებში გაყიდვებს ასახელებს — ₾4.8 მილიონი, ანუ შემოსავლის 14.9%. ქვეყნების მიხედვით სრულ ჩაშლას მხოლოდ GWS აქვეყნებს: რუსეთი ₾6.3 მილიონი (შემოსავლის 33%), პოლონეთი ₾3.4 მილიონი, ბელარუსი ₾1.9 მილიონი, უკრაინა ₾1.3 მილიონი; საქართველოში გაყიდვები ₾4.2 მილიონი იყო, საიდანაც ₾2.4 მილიონი ჩამოსასხმელი ღვინის რეალიზაციაა. „რთველისი“ 2024 წლის ჩაშლას არ იძლევა, თუმცა 2023 წლის ანგარიშგებით მისი გაყიდვების დაახლოებით 60% ადგილობრივი ბაზარი იყო. „ბადაგონი“ და „მარანი“ კი თანხობრივ ჩაშლას არ აქვეყნებენ.

ანგარიშგებებში გამოქვეყნებული საერთო მოგების მარჟები სრულად შესადარისი არ არის, რადგან კომპანიების პროდუქტების მიქსი და ხარჯების კლასიფიკაცია განსხვავდება. თვითღირებულების სრულად შესადარისად მოყვანა შეუძლებელია, თუმცა ერთი აშკარა გამონაკლისი გამოსწორებულია: „რთველისი“ ₾2.1-მილიონიან სარეკლამო ხარჯს თვითღირებულებაში ასახავს. ამ თანხის საოპერაციო ხარჯებში გადატანის შემდეგ კომპანიის საერთო მოგების მარჟა 29.9%-დან 39.0%-მდე, ხოლო საოპერაციო ხარჯები შემოსავლის 16.9%-დან 25.9%-მდე იზრდება. რეკლასიფიკაცია EBITDA-ს არ ცვლის. თანდართულ ცხრილში „რთველისის“ მარჟები და მარაგების დღეები რეკლასიფიცირებული სახითაა ნაჩვენები.

ყველაზე მაღალი, 53.9%-იანი საერთო მოგების მარჟა „თბილღვინოს“ აქვს. კომპანია შვიდეულში ყველაზე მეტს ხარჯავს რეკლამაზე. 2024 წელს „თბილღვინოს“ მარკეტინგულმა დანახარჯებმა ₾7 მილიონი, ანუ შემოსავლის 18% შეადგინა, ხოლო 2020-2024 წლებში ჯამურად ₾24 მილიონი. ეს დანახარჯები ადგილობრივ ბაზარზე კომპანიის მნიშვნელოვან პოზიციას შეესაბამება: 2024 წელს საქართველოში გაყიდვებმა ₾17.4 მილიონი შეადგინა. „თბილღვინოს“ EBITDA ₾6.0 მილიონი, EBITDA მარჟა კი 15.5% იყო. აღსანიშნავია, რომ კომპანიის ₾13.9-მილიონიანი წმინდა მოგება ერთჯერადი ეფექტის შედეგია - საოპერაციო შედეგს ₾12.1 მილიონის „სხვა მოგება“ დაემატა, საიდანაც ₾11.3 მილიონი აქტივების რეალიზაციიდან მიღებული ერთჯერადი მოგებაა. ამ ერთჯერადმა მოგებამ საკუთარი კაპიტალი ₾48.7 მილიონიდან ₾62.0 მილიონამდე გაზარდა, რაც ლევერიჯის კოეფიციენტებსაც აუმჯობესებს.

„მარანის“, „რთველისისა“ და „მილდიანის“ საერთო მოგების მარჟები 35%-40%-ის ფარგლებშია. „ბადაგონის“, GWS-ისა და „თელიანი ველის“ მარჟები კი 26%-30%-ის დიაპაზონშია.

ყველაზე დაბალი საოპერაციო ხარჯების კოეფიციენტი „მილდიანს“ აქვს: OpEx შემოსავლის 9.3%, ხოლო კომპანიის სრული სახელფასო ხარჯი შემოსავლის 3.4% იყო. სარეკლამო და მარკეტინგული ხარჯები ბრუნვის მხოლოდ 0.5%-ს შეადგენდა, მიუხედავად იმისა, რომ ექსპორტზე შემოსავლის 84% მოდიოდა. ასეთი სტრუქტურა დისტრიბუტორებზე დაფუძნებულ საექსპორტო მოდელზე შეიძლება მიუთითებდეს, თუმცა ანგარიშგება კომერციული პირობების შესახებ საკმარის ინფორმაციას არ იძლევა. 2024 წლის ბოლოს ჯგუფში მხოლოდ 43 ადამიანი იყო დასაქმებული, ანუ შემოსავალი ერთ თანამშრომელზე დაახლოებით ₾655 ათასია. შედარებისთვის, „თბილღვინოს“ 140 თანამშრომელი ჰყავს (₾280 ათასი ერთ თანამშრომელზე), „რთველისს“ — 92 (₾250 ათასი; 2022 წელს — 44), „მარანს“ — 150 (₾195 ათასი), ხოლო „ბადაგონის“ საშუალო რაოდენობა 382 იყო (₾145 ათასი).

EBITDA მარჟით ლიდერები „მილდიანი“ და „მარანი“ არიან: შესაბამისად, 29.8% და 28.3%. დანარჩენი კომპანიების EBITDA მარჟები, „თელიანი ველის“ გარდა, 10%-15%-ის ფარგლებშია. „თელიანი ველი“ ერთადერთი კომპანიაა, რომელსაც EBITDA-ს დონეზე ზარალი ჰქონდა: 2024 წლის EBITDA -₾2.0 მილიონი.

ღვინის წარმოება კაპიტალტევადი ბიზნესია, ამიტომ მნიშვნელოვანია არა მხოლოდ მოგების მარჟა, არამედ ჩადებული კაპიტალის უკუგებაც. ამ მაჩვენებლით გამოკვეთილი ლიდერი „მილდიანია“ (ROIC 19.1%). მას „რთველისი“ მოსდევს 10.8%-ით, თუმცა ეს მაჩვენებელი პირობითია: აუდიტორმა „რთველისის“ მარაგებისა და თვითღირებულების დადასტურება ვერ შეძლო (იხ. მეთოდოლოგიური შენიშვნა).

„მარანს“ შვიდეულში ყველაზე ძლიერი ფინანსური პოზიცია აქვს. 2024 წლის ბოლოს კომპანიის წმინდა ფულადი პოზიცია ₾9.1 მილიონს, Current Ratio კი 12.4x-ს შეადგენდა. ამავე დროს, კომპანიის ROIC მხოლოდ 5.3% იყო, რადგან დაახლოებით ₾112 მილიონის საშუალო ჩადებულ კაპიტალზე ₾5.9 მილიონის საოპერაციო მოგება შექმნა. მაღალი მარჟის მიუხედავად, კომპანია აქტივების ყოველ ₾1-ზე მხოლოდ ₾0.23 შემოსავალს ქმნის, რაც საწარმოს არასრულ დატვირთვაზე შეიძლება მიუთითებდეს. დაბალრისკიანი ფინანსური პროფილი აქვს „მილდიანსაც“: მისი Net Debt/EBITDA 0.4x, Current Ratio კი 3.7x იყო.

რაც შეეხება GWS-ს, კომპანიამ სესხები ₾8.8 მილიონიდან ₾4.0 მილიონამდე, ხოლო Net Debt/EBITDA 3.8x-დან 1.2x-მდე შეამცირა. დელევერიჯინგში მნიშვნელოვანი როლი მშობელი კომპანიის მხარდაჭერამ შეასრულა: 2023-2024 წლებში კაპიტალის შენატანებმა ჯამურად ₾10.0 მილიონი შეადგინა.

„თბილღვინოს“ Net Debt/EBITDA 2023 წლის 6.4x-დან 3.4x-მდე შემცირდა, ხოლო სესხები ₾7.6 მილიონით დაიკლო. ვალის შემცირების მნიშვნელოვანი წყარო ₾12.7 მილიონის ძირითადი საშუალებების გაყიდვა იყო და არა მიმდინარე ოპერაციებიდან მიღებული ფული.

„რთველისის“ ხუთ წელიწადში ₾23.2-მილიონიან შემოსავალზე გასვლას წარმოებისა და საბრუნავი კაპიტალის ერთდროული დაფინანსება დასჭირდა. 2024 წლის ბოლოს ძირითად საშუალებებსა და მარაგებში ჯამურად ₾24.0 მილიონი, ანუ აქტივების დაახლოებით 80% იყო ჩადებული. ეს აქტივები დაფინანსებული იყო ₾8.5 მილიონის საკუთარი კაპიტალით, ₾12.9 მილიონის სესხებით (დარიცხული პროცენტის ჩათვლით) და ₾7.0 მილიონის სავაჭრო კრედიტით. კომპანიას მხოლოდ ₾0.2 მილიონის ფულადი სახსრები ჰქონდა, Net Debt/EBITDA კი 3.9x-ს შეადგენდა.

„ბადაგონს“ ძალიან მაღალი ლევერიჯი აქვს. კომპანიის სესხები ერთ წელიწადში ₾25.9 მილიონიდან ₾45.5 მილიონამდე გაიზარდა, Net Debt/EBITDA კი 7.7x გახდა. Current Ratio მხოლოდ 0.57x იყო. ვალის ზრდას ერთდროულად ახლდა ₾16.2 მილიონის CapEx, ₾6.0 მილიონის დივიდენდი და დაკავშირებულ მხარეებზე ₾4.4 მილიონის უპროცენტო სესხების გაცემა, მაშინ როდესაც FCFF -₾5.0 მილიონი იყო. 2024 წლის ბოლოსთვის ალავერდის სასტუმროს მშენებლობაზე ჯამურად ₾13.3 მილიონი იყო დახარჯული.

უარყოფითი EBITDA-ს ფონზე „თელიანი ველის“ სესხები და საიჯარო ვალდებულებები ₾32.1 მილიონს, ანუ აქტივების დაახლოებით 72%-ს შეადგენდა. წმინდა ვალი ₾31.0 მილიონი, საკუთარი კაპიტალი -₾4.3 მილიონი, Current Ratio კი 0.84x იყო. კომპანიის საქმიანობის გაგრძელება მშობელი კომპანიების ფინანსურ მხარდაჭერაზეა დამოკიდებული. 2025 წელს ₾9.2 მილიონის საბანკო სესხი 2029 წლამდე ვადის მქონე, დოლარში დენომინირებული მშობელი კომპანიის სესხით ჩანაცვლდა.

2024 წლის ბოლოს სასესხო კოვენანტები დაარღვიეს „ბადაგონმა“, „თელიანი ველმა“, „თბილღვინომ“ და GWS-მა. GWS-მა ბანკისგან ოფიციალური waiver მიიღო 2024 წლის 27 დეკემბრიდან ერთი წლით, „თელიანი ველმა“ — 2025 წლის ბოლომდე, ხოლო „თბილღვინოს“ ბანკმა წერილობით დაუდასტურა, რომ ვადამდელი დაფარვის მოთხოვნას ამ ეტაპზე არ გეგმავს (დარღვეული იყო DSCR და FCF/ვალის მომსახურების კოეფიციენტები). „ბადაგონის“ მთელი სასესხო ვალდებულება მიმდინარე ვალდებულებად კლასიფიცირდა; დარღვევა კომპანიას 2023 წლის ბოლოსაც ჰქონდა. დარღვევები ოთხივე კომპანიის კრედიტორებზე დამოკიდებულებას ზრდის.

ღვინის ბიზნესში კაპიტალის ყველაზე დიდი ნაწილი არა მხოლოდ ვენახებსა და საწარმოშია, არამედ საწყობში. მარაგების დღეები შვიდეულში 261-დან 764-მდე მერყეობს. „მარანს“ ₾33.1 მილიონის მარაგი აქვს — წლიურ შემოსავალზე მეტი (672 დღე; ფულის კონვერსიის ციკლი დაახლოებით 790 დღე) — და სწორედ ეს, და არა მხოლოდ ძირითადი საშუალებები, ხსნის, მაღალი მარჟების მიუხედავად, რატომ არის მისი ROIC 5%. GWS-ს ₾19 მილიონის შემოსავალზე ₾28.7 მილიონის მარაგი აქვს (764 დღე). „ბადაგონის“ მარაგების დღეები (278) ზომიერია, თუმცა მისი სავაჭრო ვალდებულებები ₾15.5 მილიონიდან ₾21.5 მილიონამდე გაიზარდა და მომწოდებლებთან ანგარიშსწორების საშუალო ვადა 172 დღემდე გაიწელა. მარაგების ყველაზე სწრაფი ბრუნვა „რთველისს“ და „მილდიანს“ აქვთ (260-270 დღეების ფარგლებში).

ღვინის წარმოება კაპიტალტევადი ბიზნესია და მნიშვნელოვან ინვესტიციებს მოითხოვს ვენახებსა თუ საწარმოო ხაზებში. 2022-2024 წლებში შვიდეულის CapEx-მა მინიმუმ ₾85 მილიონი შეადგინა. სრული თანხა უფრო მაღალია, რადგან „მილდიანის“ 2022 წლის CapEx ცალკე არ არის გამოქვეყნებული. დანახარჯების დაახლოებით 67% „ბადაგონზე“, „თბილღვინოსა“ და GWS-ზე მოდიოდა.

კაპიტალური დანახარჯები 2022-24 წლებში ჯამურად:

1️⃣ ბადაგონი: ₾28.7 მილიონი

2️⃣ თბილღვინო: ₾14.3 მილიონი

3️⃣ თელიანი ველი: ₾2.8 მილიონი

4️⃣ მარანი: ₾7.6 მილიონი

5️⃣ მილდიანი: მინიმუმ ₾8.4 მილიონი (მოიცავს მხოლოდ 2023-24 წლებს)

6️⃣ რთველისი: ₾9.6 მილიონი (აუდიტორმა 2024 წლის ბოლოს არსებული ძირითადი საშუალებების, მარაგებისა და თვითღირებულების დადასტურება ვერ შეძლო)

7️⃣ GWS: ₾13.6 მილიონი

FCFF აჩვენებს, რამდენი ფული რჩება კომპანიას საოპერაციო საჭიროებებისა და კაპიტალური დანახარჯების დაფინანსების შემდეგ, სესხების მომსახურებამდე და მფლობელებზე განაწილებამდე. „რთველისის“ გამოკლებით, ექვსი კომპანიიდან დადებითი თავისუფალი ფულადი ნაკადები მხოლოდ ორს ჰქონდა: „მარანს“ (₾19.7 მილიონი) და „მილდიანს“ (მაქსიმუმ ₾2.4 მილიონი). დანარჩენი ოთხის FCFF -₾1.1 მილიონიდან -₾11.3 მილიონამდე მერყეობდა.

მფლობელებზე განაწილება (დივიდენდები და კაპიტალის შემცირება) იმავე პერიოდში ასე გამოიყურება:

1️⃣ ბადაგონი: ₾15.8 მილიონი (₾12.4 მილიონი დივიდენდი და ₾3.4 მილიონი კაპიტალის შემცირება)

2️⃣ თბილღვინო: ₾6.6 მილიონი

3️⃣ თელიანი ველი: 0

4️⃣ მარანი: ₾14.9 მილიონი

5️⃣ მილდიანი: ₾8.3 მილიონი

6️⃣ რთველისი: ₾1.7 მილიონი (კაპიტალის შემცირება 2024 წელს)

7️⃣ GWS: 0

ოთხმა კომპანიამ („ბადაგონმა“, „თბილღვინომ“, „მარანმა“ და „მილდიანმა“) მფლობელებს ჯამურად ₾45.6 მილიონი გაუნაწილა. მათგან განაწილება საკუთარი თავისუფალი ფულადი ნაკადით მხოლოდ „მარანმა“ დაფარა და 2024 წლის ბოლოს კომპანიას დამატებით ₾12.6 მილიონის ფულადი სახსრებიც ჰქონდა. დანარჩენი სამის განაწილებები სხვა წყაროებს მოითხოვდა: „ბადაგონის“ შემთხვევაში — მზარდ სესხებს, „თბილღვინოს“ შემთხვევაში — ძირითადი საშუალებების ₾12.7 მილიონად რეალიზაციას, „მილდიანის“ შემთხვევაში — არსებულ ფულად მარაგსა და ახალ სესხებს.

აღსანიშნავია, რომ 2019 წელს დაფუძნებულმა „რთველისმა“ 2024 წელს უკვე კაპიტალის უკან გატანა დაიწყო (₾1.7 მილიონი), მაშინ, როდესაც მისი ანგარიშგებული FCFF ჯერ კიდევ უარყოფითი იყო და ფულადი სახსრები ₾0.2 მილიონს არ აღემატებოდა.

GWS-სა და „თელიანი ველს“ მფლობელებზე არაფერი გაუნაწილებიათ; პირიქით, მათი უარყოფითი თავისუფალი ფულადი ნაკადები სესხებითა და მფლობელების მხარდაჭერით დაფინანსდა. GWS-ის მშობელმა კომპანიამ 2022-2024 წლებში ₾15.4 მილიონის კაპიტალის შენატანი განახორციელა, „თელიანი ველს“ კი მშობელი კომპანიების სესხები აფინანსებს.

1️⃣ სს „ბადაგონი“
• გიორგი სალაყაია: 100%
2024 წლის ანგარიშგება გიორგი სალაყაიას ერთადერთ აქციონერად ასახელებს, თუმცა ასევე აღწერს 2018 წელს დაწყებულ დავას კომპანიის აქციებზე საკუთრების უფლებასთან დაკავშირებით. თბილისის საქალაქო და სააპელაციო სასამართლოებმა მოსარჩელის მოთხოვნა არ დააკმაყოფილეს; საქმე საკასაციო წესით საქართველოს უზენაეს სასამართლოში გასაჩივრდა. შესაბამისად, ანგარიშგებული მფლობელობა 100%-იანია, მაგრამ აქციების სამართლებრივ სტატუსზე დავა საბოლოოდ დასრულებულად არ იყო წარმოდგენილი.

2️⃣ სს „თბილღვინო“
• გიორგი მარგველაშვილი: 50%
• ზურაბ მარგველაშვილი: 50%

3️⃣ სს „თელიანი ველი“
• სს „ჯორჯიან ბევერიჯის ჰოლდინგი“
პირდაპირი მფლობელი; ჯგუფის საბოლოო მშობელი: Georgia Capital PLC.

4️⃣ სს „თელავის ღვინის მარანი“ (მარანი)
• ზურაბ რამაზაშვილი: 49.99%
• კახა ზუკაკიშვილის სამართალმემკვიდრეები: 49.99%
• სხვა აქციონერები: 0.02%

5️⃣ შპს „წინანდლის ძველი მარანი“ (მილდიანი)
• ნანი მენაბდიშვილი: 100%

6️⃣ შპს „რთველისი“
• თორნიკე ჭიკაძე: 20%
• ნიკოლოზ იმერლიშვილი: 20%
• ალექსანდრე ჭიკაიძე: 20%
• თორნიკე ქორთოშიძე: 20%
• ზაური ქორთოშიძე: 20%

7️⃣ GWS
• სს „მარუსია ბევერიჯის ჯორჯია“ — 100%
პირდაპირი მფლობელი; საბოლოო მშობელი კომპანია: Sastre Holding SA (შვეიცარია); საბოლოო მაკონტროლებელი პირი: ფრედერიკ პაულსენი, The Paulsen Familiae Foundation-ის მეშვეობით.