/
გავეცნოთ სამშენებლო და სარემონტო მასალების ჰიპერმარკეტებს 3 კომპანიის მაგალითზე:
შპს “გორგია” (Gorgia)
შპს “მოდუსი” (Modus)
შპს “ტერმინალ ვესტ თრეიდინგი” (Domino • დომინო)
დასკვნით სექციაში შეგიძლიათ იხილოთ წარმოდგენილი კომპანიების შემოსავლების დინამიკა ორ მცირე ზომის კონკურენტთან ერთად: შპს “ჰუალინგი-სამშენებლო მასალების ჰიპერმარკეტი” (Mihouse • მიჰაუსი) და შპს „ბრიკო კავკასუს” (Bricorama • ბრიკორამა).
სამივე კომპანიის საქმიანობას წარმოადგენს სამშენებლო-სარემონტო მასალების საცალო და საბითუმო რეალიზაცია. კომპანიები ძირითადად ოპერირებენ “აკეთე შენით” ე.წ. DIY (do-it-yourself) კონცეფციის ჰიპერმარკეტების საშუალებით.
სარეალიზაციო პროდუქციის უმეტესობა წარმოადგენს იმპორტირებულ საქონელს, თუმცა ბოლო წლებში იმატა ადგილობრივი წარმოების პროდუქციამაც.
უძრავი ქონების სექტორში გაზრდილი აქტივობის ფონზე, მოთხოვნა გაიზარდა სარემონტო მასალებზეც. შესაბამისად, 2020 წლის გამოკლებით, გაყიდვების აღმავალ ტრენდს ვხედავთ თითქმის ყველა მოთამაშის შემთხვევაში (იხ. დასკვნითი სექცია).
სამივე განხილული კომპანია წარმოადგენს მსხვილ და მრავალწლიანი გამოცდილების მქონე სარემონტო მასალების ჰიპერმარკეტს, რომელსაც სექტორისთვის საკმაოდ მაღალი მომგებიანობის მაჩვენებლები აქვს. ბაზარზე შედარებით გვიან გამოჩენილი და მცირე ბრუნვის მქონე კომპანიები კი ხშირ შემთხვევაში წაგებაზე ოპერირებენ:
კომპანიების ფინანსური ანალიზისთვის შევხედოთ 2022 წლის მონაცემებს.
სამშენებლო-სარემონტო მასალების მაღაზიების სექტორში გორგია უპირობო ლიდერია როგორც ბრუნვის, ასევე გეოგრაფიული დაფარვის თვალსაზრისით. გორგიას შემოსავლებმა ₾272 მილიონი შეადგინა 2022 წელს, რაც თითქმის 16%-ით აღემატება 2021 წლის შემოსავლებს. მოდუსის და დომინოს შემოსავლებმა კი ₾145 მილიონი და ₾131 მილიონი შეადგინა, შესაბამისად.
2019-2022 წლებში კომპანიების საშულო წლიური ზრდა 9%-30%-ის ფარგლებში იყო. დომინოს მაღალი ზრდის ტემპი ძირითადად განაპირობა 2021 წლის ბოლოს გახსნილმა მეორე ჰიპერმარკეტმა.
კომპანიების საერთო მოგების მარჟები 30%-ის ირგვლივაა, რაც თანხვედრაშია საერთაშორისო წამყვანი DIY სექტორის მოთამაშეების მარჟებთან.
სექტორისთვის დამახასიათებელი დაბალი საერთო მარჟის პირობებში, კომპანიების მნიშვნელოვანი ფოკუსი მიმართულია საოპერაციო ხარჯების მართვაზე. კომპანიების საოპერაციო ხარჯების წილი შემოსავლებში 16%-24%-ის ფარგლებშია.
DIY კომპანიების მომგებიანობის მაჩვენებლები სექტორისთვის საკმაოდ კარგად გამოიყურება. EBITDA მარჟები 10%-17%ის ფარგლებშია.
კონკურენტებს შორის, ყველაზე დაბალი მომგებიანობის მაჩვენებლები დომინოს აქვს. ამასთან ერთად, დომინო ყველაზე მაღალ-ლევერიჯიანიცაა, რაც კომპანიის წმინდა მოგების ყველაზე დაბალ მარჟასაც განაპირობებს.
დომინოს მიერ აღებული სესხი მთლიანი აქტივების 93%-ს წარმოადგენს, მაშინ როდესაც კონკურენტების იგივე მაჩვენებელი 17%-40%-ის ფარგლებშია.
როგორც levered free cash flow-ში ხედავთ, გორგიას და მოდუსს საკმარისი სახრები ჰქონდათ დივიდენების გასაცემად 2022 წელს. დომინოს კი მაღალი ლევერიჯის გამო აღარ რჩება თანხა დივიდენდის გასაცემად.
2019-2022 წლებში კუმულატიურად გაცემული დივიდენდები:
– “გორგია“: ₾30.2 მილიონი
– “მოდუსი“: ₾17.1 მილიონი
– “დომინო“: ₾– (არ აქვს საკმარისი cash flow)
🟢 რა იქნება შემდგომი ნაბიჯი სამშენებლო-სარემონტო ჰიპერმარკეტებისთვის? რა მოუტანს კომპანიებს განვითარების სხვა ეტაპზე გადასვლის შესაძლებლობას? ერთ-ერთ შესაძლებლობად შეიძლება განვიხილოთ ეკოსისტემის შექმნა, სადაც მომხმარებელს ერთ სივრცეში მეტი საჭირო და დაკავშირებული სერვისის მიღების საშუალება ექნება:
- მაგალითისთვის, რამდენიმე თვის წინ ერთ-ერთი ვებსაიტიდან გამოვიწერე მაგიდა, რომელიც, აღწერის მიხედვით, სახლის პირობებში მარტივად უნდა ამეწყო. აღმოჩნდა, რომ სათანადო ხელსაწყოები არ მქონდა და, ამავდროულად, არც ისე მარტივი ასაწყობი ყოფილა. შესაბამისად, მომიწია სხვა კომპანიასთან დაკავშირება და ხელოსნის გამოძახების სერვისით სარგებლობა;
- ეს პროცესი გაცილებით მარტივად ჩაივლიდა, საშუალება რომ მქონოდა (i) მაგიდის გამოწერასთან ერთად ხელსაწყოები მექირავებინა; ან (ii) მაგიდის აწყობის სერვისი გამოწერასთან ერთად მომეთხოვა;
- ან, მაგალითად, მომხმარებელს უნდა აბაზანის კოსმეტიკური რემონტი. გაცილებით კომფორტული იქნება, თუ საჭირო მასალებთან ერთად მომხმარებელს შესაძლებლობა მიეცემა ეს რემონტი თავისი ხელსონების გამოძახებით ერთ სივრცეში მოაგვაროს;
- პროფესიონალი ხელოსნების გამოძახების სერვისები უკვე არსებობს. შესაბამისად, მსხვილ DIY კომპანიებს შეუძლიათ თავიანთი ეკოსისტემის გაფართოება მსგავსი კომპანიების შესყიდვით, in-house განვითარებით, ან მათთან დაპარტნიორებით.
სამშენებლო/სარემონტო სექტორში ძირითადი მოთამაშეების შემოსავლების დინამიკა იხილეთ ქვედა გრაფიკში. დამატებით ასევე დატანილია შედარებით მცირე ზომის კონკურენტების ("მიჰაუსი" და "ბრიკორამა") ინფორმაციაც:
(i) "მიჰაუსი" წარმოდგენილ კონკურენტებს შორის ყველაზე გვიან გამოჩნდა ბაზარზე და შემოსავლების ყველაზე სწრაფ ზრდის ტემპს აფიქსირებს. ამას ახერხებს ძალიან დაბალი, 20%-იანი საერთო მოგების მარჟით. როგორც ჩანს, კომპანიას უღირს საწყის წლებში საოპერაციო ზარალზე ოპერირება ბაზარზე თავის დამკვიდრების მიზნით;
(ii) "ბრიკორამა" განხილულ კონკურენტებს შორის ერთადერთია, რომლის შემოსავლებიც დაღმავალ ტრენდზეა. კომპანიის შემოსავლები 2019 წელთან შედარებით განახევრებულია და კომპანია ბოლო წლებში ზარალზე ოპერირებს. კომპანია წყვეტს ოპერირებას 2024 წლის აპრილიდან.
კომპანიის მფლობელები:
1️⃣ გორგია
💼 კომპანიის მფლობელი:
- გია გორგოშაძე: 100%
2️⃣ მოდუსი
💼 კომპანიის მფლობელი:
- ამირან დარჩიძე: 100%
3️⃣ დომინო
💼 კომპანიის საბოლოო მაკონტროლებელი მხარე:
- ოლეგ პავლოვი ("Quadrum Investment Management Limited"-ის გავლით)
დამატებითი ინფო: Quadrum Investment Management Limited საქართველოში ასევე ფლობს შპს CBD Development-ს (სავაჭრო ცენტრი "ისთ ფოინთი") და შპს BD Property-ს ("თბილისი გარდენს").