კომპანიას სამი ფილიალი აქვს (საბურთალო, გლდანი და გალერია თბილისი), პროდუქცია კი Glovo-სა და Wolt-ის მეშვეობითაც იყიდება. 2024 წელს კომპანიას საშუალოდ 29 თანამშრომელი ჰყავდა.
🎯 "ბურგერ ლომების" შემოსავალი 2023-25 წლებში გასამმაგდა, ამავე პერიოდის წმინდა მოგების 91% კი დივიდენდად გაიცა. იჯარით მუშაობა და მოკლე საბრუნავი კაპიტალის ციკლი დაფინანსების საჭიროებას ამცირებს. 2025 წლის ბოლოს კომპანიას სასესხო ვალდებულება არ ჰქონდა. საერთო მოგების მარჟის გაუმჯობესებამ კი საოპერაციო ხარჯების გაზრდილი წილი გადაფარა და EBITDA მარჟა 7.8%-დან 9.4%-მდე გაიზარდა.
📈 2025 წელს შემოსავალი 71%-ით, ₾8.5 მილიონამდე გაიზარდა. ეს 2024 წელს გახსნილი მესამე ფილიალის პირველი სრული წელია. 2023 წლიდან შემოსავალი გასამმაგდა.
📑 2025 წელს საერთო მოგების მარჟამ 49.5% შეადგინა (2024: 43.9%). საოპერაციო ხარჯები (ცვეთის გარეშე) 89%-ით, ₾3.4 მილიონამდე გაიზარდა და შემოსავლის 40.0% შეადგინა (2024: 36.1%). OpEx-ის უმსხვილესი კომპონენტი ხელფასებია, რამაც ₾1.6 მილიონი, შემოსავლის 18.5% შეადგინა (2024: 14.4%). მეორე მსხვილი კომპონენტი საკურიერო მომსახურებაა: ₾893 ათასი, შემოსავლის 10.5% (2024: 10.2%). შედეგად, EBITDA-მ ₾798 ათასი შეადგინა, EBITDA მარჟამ კი 9.4% (2024: 7.8%). შედარებისთვის, finSPOT-ზე ხუთი კონკურენტის შემოსავლით შეწონილი საოპერაციო მარჟა 6.9% იყო (ბოლო ხელმისაწვდომი წელი), "ბურგერ ლომების" 2025 წლის საოპერაციო მარჟა კი 8.5%.
🏦 2025 წლის ბოლოს კომპანიას სასესხო ვალდებულება არ ჰქონდა, ვალდებულებები კი მხოლოდ ₾104 ათასის სავაჭრო კრედიტორული დავალიანებით შემოიფარგლებოდა. იჯარით მუშაობა ფართების შეძენას არ მოითხოვს, მარაგებისა და მოთხოვნების სწრაფი ბრუნვა კი ყოველდღიურ საქმიანობაში ფულის საჭიროებას ამცირებს. საკუთარი კაპიტალი ₾646 ათასი იყო და აქტივების 86%-ს აფინანსებდა. ამ მცირე კაპიტალზე კი 2025 წლის ROAE 109.5% იყო.
💰 2023-25 წლებში კომპანიამ დივიდენდად ჯამურად ₾916 ათასი გასცა, ანუ ამავე პერიოდის წმინდა მოგების 91%. 2024 წელს დივიდენდმა (₾421 ათასი) წმინდა მოგებას (₾264 ათასი) გადააჭარბა. 2025 წლის დივიდენდი ₾495 ათასი იყო, წლის წმინდა მოგების 78%. წლის ბოლოს ბალანსზე არსებული ფულადი ნაშთი ₾152 ათასს შეადგენდა.
📊 2025 წლის ძირითადი მაჩვენებლები:
- შემოსავალი: ₾8.5 მლნ (+70.7% წ/წ)
- საერთო მოგების მარჟა: 49.5%
- საოპერაციო მოგების მარჟა: 8.5%
- EBITDA: ₾798 ათასი
- EBITDA მარჟა: 9.4%
- წმინდა მოგება: ₾633 ათასი (მარჟა: 7.5%)
- დივიდენდი (2023-25): ₾916 ათასი (2025: ₾495 ათასი)
