ლის 24 ივლისს კომპანიამ ფინანსთა სამინისტროსთან გააფორმა ლატარიის ორგანიზების ექსკლუზიური ხელშეკრულება 10 წლის ვადით (ტენდერის ფასი $5.0 მილიონი). პროდუქტი ორ სეგმენტს მოიცავს: მომენტალური/გადასაფხეკი ბილეთები და ტირაჟიანი ლოტო (ლოტო 6/42, 5/35, კენო).
📑 ლატარიის შემოსავლები ორ ჭრილში შეიძლება განვიხილოთ: (1) მთლიანი ბრუნვა/გაყიდვები, და (2) წმინდა შემოსავალი (GGR). 2025 წელს ბილეთების მთლიანმა გაყიდვებმა (ბრუნვა) ₾40.4 მილიონი შეადგინა (2024: ₾41.1 მლნ), საპრიზო ფონდის გამოკლების შემდეგ კი აღიარებული შემოსავალი (GGR) ₾16.1 მილიონი იყო.
📑 მომენტალურ/გადასაფხეკ ბილეთებზე მთლიანი გაყიდვების 83% მოდის, სადაც საპრიზო ფონდის წილი („payout“) პროპორციულად ყველაზე მაღალია (62%); ტირაჟიან ლოტოზე კი გაყიდვების 17% მოდის, სადაც საპრიზო ფონდის წილი შედარებით დაბალია (52%).
📑 სახელმწიფო მოსაკრებელი GGR-ის მხოლოდ ~10%-ია, ბევრად ნაკლები, ვიდრე სხვა ქვეყნების ეროვნული ლატარიების უმეტესობაში (მაგ. FDJ ~62%).
📑 საინტერესოა, რომ ზოგადად ინდუსტრიის მთავარი ზრდის წყარო, ციფრული/ონლაინ არხი, საქართველოს ეროვნული ლატარიის შემთხვევაში პრაქტიკულად არ არსებობს: ფინანსთა სამინისტრომ 2023 წელს, წინა ონლაინ თამაშების ვადის ამოწურვის შემდეგ, დროებით შეაჩერა ახალი რეგლამენტის ხელახალი შეთანხმება. შედეგად, კომპანიას არ გააჩნია ინდუსტრიის ძირითადი ზრდის ბერკეტი, მაშინ როდესაც ფიზიკური გაყიდვები სტაგნაციაშია.
📑 მომგებიანობა სტრუქტურულად სუსტია. კომპანია 2019-2025 წლებში თითქმის ყოველ წელს ზარალიანი იყო (ერთადერთი გამონაკლისი 2024 წელი იყო, მცირე ₾0.2 მლნ საოპერაციო მოგებით). EBITDA-მ 2024-ში პიკს მიაღწია (₾2.2 მლნ; 13% მარჟა), 2025-ში კი ხელახლა უარყოფითი გახდა (−₾0.3 მლნ), GGR-ის შემცირებისა და პერსონალის ხარჯის ზრდის (₾3.9 → ₾5.0 მლნ) ფონზე. წმინდა მოგებას ტვირთად აწვება ფინანსური ხარჯი და სავალუტო რისკი. 2025 წელს წმინდა ზარალი −₾4.3 მილიონი იყო (2024: −₾3.2 მლნ), ხოლო EBITDA საუკეთესო წლებშიც კი ვერ ფარავდა ~₾2.5 მილიონ წლიურ საპროცენტო ტვირთს.
📑 კომპანია ტექნიკურად გადახდისუუნაროა. 2025 წლის ბოლოს დაგროვილმა ზარალმა −₾32.8 მილიონი შეადგინა და ყოველწლიურად იზრდება. მთლიანი ვალი (სესხები + იჯარა) ₾25.4 მილიონია, რაც მოიცავს როგორც საბანკო (₾9.0 მლნ), ასევე დამფუძნებლისგან მიღებულ სესხს (₾11.9 მლნ). სესხების დაფარვის ვადა 2027 წელია, ვინაიდან სწორედ ამ წელს ეწურება კომპანიის ექსკლუზიურ ლიცენზიას ვადა.
📑 მაღალ ლევერიჯს ემატება დაბალი ლიკვიდურობაც. წლის ბოლოს ფული მხოლოდ ₾0.7 მლნ იყო, მოკლევადიანი ვალდებულებები კი მოკლევადიან აქტივებს ₾17.6 მილიონით აღემატება (0.17x). ამ ფონზე რა თქმა უნდა დივიდენდი არ გაცემულა.
⚠️ აუდიტორმა მოსაზრების გამოთქმაზე უარი თქვა (disclaimer of opinion) და მიუთითა ფუნქციონირების გაგრძელების არსებით განუსაზღვრელობაზე. კომპანია არღვევს საბანკო კოვენანტებსაც და ფინანსთა სამინისტროსთან სალიცენზიო ხელშეკრულებასაც. დაუფარავმა ლატარიის მოსაკრებელმა ₾5.1 მილიონს მიაღწია, ხოლო სამინისტროს სასარგებლოდ კომპანიის მთელ ქონებაზე გირავნობა მოქმედებს. მთავარი კი 2027 წლის ლიცენზიის ამოწურვაა, ვინაიდან თუ კომპანიამ ხელახლა ვერ მოიპოვა ეს ექსკლუზიური უფლება, ბიზნესი პრაქტიკულად აღარ რჩება.
2025 წლის ძირითადი მაჩვენებლები:
- ბილეთების მთლიანი გაყიდვები (Handle): ₾40.4 მილიონი (−1.6% წ/წ)
- საპრიზო ფონდის კოეფიციენტი (Payout | RTP): 60% (2024: 58%; ისტ. ~55%)
- ჰოლდი (GGR / მთლიანი გაყიდვები): 40%
- პროდუქტის მიქსი (ბრუნვა): მომენტალური 83% (ჰოლდი 38%) / ლოტო 17% (ჰოლდი 48%)
- წმინდა შემოსავალი (GGR): ₾16.1 მილიონი (−6.6% წ/წ)
- საოპერაციო ზარალი: −₾2.3 მილიონი
- EBITDA: ~−₾0.3 მილიონი
- წმინდა ზარალი: −₾4.3 მილიონი
- მთლიანი ვალი (სესხები + იჯარა): ₾25.4 მლნ (ბანკი ₾9.0 / დამფუძ. ₾11.9 / სხვ. ₾3.1 + იჯარა ₾1.4)
- ფულადი სახსრები: ₾0.7 მილიონი
- ლიცენზიის ვადა: 2027 წლის 24 ივლისი
- დივიდენდები (2018-2025): 0 (არ გაუცია)
